नेपाली कांग्रेसका नेता डा. शेखर कोइरालाले कांग्रेसले आफ्नो औचित्य पुष्टि गर्न नसके नाम मात्रैमा सीमित बन्ने बताएका छन् ।

शुक्रबार काठमाडौंमा आयोजित एक कार्यक्रमलाई सम्बोधन गर्दै उनले अहिले कांग्रेस व्यवहारवादी बन्दै चुक्दै गएको बताए । ​कोराइलाले कांग्रेसले सिद्धान्तहरूलाई छोड्दै जानु चिन्ताको विषय भएको बताए । 

‘नेपाली कांग्रेसको विगतको जुन चरित्र थियो । त्यो चरित्रमा कता–कता अलमलिएको हो कि भन्ने मलाई लाग्छ । नेपाली कांग्रेस धेरै व्यवहारवादी भयौँ । व्यवहारवादी हुँदा हामीले कतै गल्ती गरिरहेका हुन्छौं । नेपाली कांग्रेसको इतिहास हेर्दा गौरवमय छ । निरङ्कुशका विरुद्ध लड्दा कहिल्यै पनि चुकेको छैन । त्यसपछिका दिनमा नेपाली कांग्रेस व्यवहारवादी भएर चुक्दै गएका छौँ,’ उनले भने, ‘सिद्धान्तहरूलाई छोड्दै जान्छौँ । यो कुरा नेपाली कांग्रेसको लागि चिन्ताको विषय बनेको छ । अब संस्थाहरूको ४ वर्षमा लेखाजोखा गरेजस्तै अब राजनीतिक पार्टीहरूले पनि ५/६ वर्षमा पार्टीहरूको औचित्य पुष्टि गर्न जरुरी भएको छ ।’ 

कोइरालाले कसैले पनि लोकरिझ्याइँको राजनीति गरेर चर्चा कमाउनुको कुनै अर्थ नरहने बताए । उनले अहिले कुनै पनि संवैधानिक संस्थाहरूमा सवल बन्न नसकेको जिकिर गर्दै संसदको समेत अवस्था चिन्ताजनक रहेको पनि उल्लेख गरे ।  

‘अहिले कुनै पनि संवैधानिक संस्थाहरूमा सवल छैनन्, संसद नै हेर्नुस् । संसद् हो की होइन भन्ने लाग्न थालेको छ । संसदमा दोहोरी हुन्छ । संसदमा प्रधानमन्त्री बोलेपछि संसद रोकिन्छ । तर प्रमुख प्रतिपक्ष दलको नेताले म बोल्छु भन्नुहुन्छ । त्यो संसदीय मर्यादा विपरीत हो । तर हामी कतै बोल्दैनौँ र लेख्दैनौँ पनि अनि कसरी लोकतन्त्र फस्टाउँछ । प्रधानमन्त्री बोलिरहेको अवस्थामा प्रधानमन्त्रीसँग दोहोरी खेल्न हुँदैन,’ कोइरालाले भने, ‘त्यो गलत हुन्छ । यस्तो काम सबै लोकप्रियताको लागि गर्दैछन् । चारैतिर टेलिभिजनमा हेरेर मेरो मान्यले यस्तो बोल्यो । ठीक गर्‍यो प्रधानमन्त्रीलाई कठघरमा उभ्यायो । त्यो गर्ने समय हुन्छ । यसरी लोकप्रियताले केही समयको लागि ठिकै होला ।’ 

कोइरालाले राजनीति देशमा कुनै पनि ठाउँमा राम्रो नरहेको दाबी पनि गरे । उनले सरकारले संवैधानिक निकायहरू निर्वाचन आयोग, अख्तियार दुरुपयोग अनुसन्धान आयोग, मानव अधिकार आयोगलगायतका निकायको अधिकार कटौती गर्दासमेत सांसद मौन बसेको बताए । कोइरालाले सरकारले मुलुकमा सुशासन दिन नसकेको बताए ।  

‘मुलुकको राजनीतिले कुनै पनि क्षेत्रमा राम्रो छैन । विश्वविद्यालयहरू हेर्नुभयो भने त्यस्तै छ । अहिले के अवस्थामा विश्व विद्यालयहरू छन् । एउटा मात्रै विश्वविद्यालयको कुरा गरेको छैन । देशभरका विश्वविद्यालयको अवस्था एउटै छ । विद्यार्थीहरूको आचरण हेर्नुस् । मलाई नेविसंघदेखि चित्त बुझेको छैन । त्यो अवस्थामा देश गइरहेको छ । सरकारका संवैधानिक निकायहरू निर्वाचन आयोग,अख्तियार दुरुपयोग अनुसन्धान आयोग,मानव अधिकार आयोग हेर्नुस्,’ कोइरालाले भने, ‘अधिकार नै सरकारले काटिदियो । हामी सांसदहरू चुप लागेर बस्छौँ । अनि आशा के गर्छाैँ भने डेमोक्रेसी फस्टाओस् । दण्डहीनता नहोस् । मानव अधिकार आयोगको अधिकार कटौती गरेपछि दण्डहीनता बढ्छ । आयोग एउटा अधिकार लिएर बेलेको हुन्छ । सरकारले मुलुकमा सुशासन दिन सकेकै छैन ।’  

उनले लोकप्रियताको नाममा लोकरिजाँईको राजनीति हाबी हुँदै गएकोप्रति चिन्तासमेत व्यक्त गरे ।