नेपाली क्रिकेट टिमका अनुभवी तीव्र गतिका बलर करण केसीले पाकिस्तानमा जारी एसिया कपमा इतिहास रचेका छन् । उनले एसिया कप एकदिवसीय प्रतियोगितामा पहिलो विकेट लिने नेपाली बलर बन्दै इतिहास रचेका हुन् ।
करणले बुधबार उद्घाटन खेलमा पाकिस्तानका ओपनिङ ब्याटर फखर जमानलाई ५.३ ओभरमा १४ रनमा आउट गर्दै यो उपलब्धि हासिल गरे । उनले फखरलाई विकेटकिपर आसिफ शेखको हातबाट क्याच आउट गराए ।
यस्तै, नेपाललाई दोस्रो सफलता कप्तान रोहितकुमार पौडेलले सफलता दिलाए । उनले ६.१ ओभरमा ओपनिङ ब्याटर इमा-उल-हकलाई ५ रनमा रनआउट गरे । त्यसअघि ४.५ ओभरमा सोमपाल कामीको ओभरमा आरिफ शेखले क्याच ड्रप गर्न पुगे ।
मुल्तान क्रिकेट स्टेडियममा जारी खेलमा नेपालले टस हारेर फिल्डिङको निम्तो पाएको हो । यो समाचार तयार पार्दासम्म पाकिस्तानले ९ ओभरमा दुई विकेट गुमाएर ३८ रन बनाएको छ ।
पकिस्तान र नेपालले पहिलोपटक एकदिवसीय अन्तर्राष्ट्रिय खेल खेलिरहेका हुन् ।
पाकिस्तानविरुद्ध नेपालको प्लेइङ–११ः कुशल भुर्तेल, आसिफ शेख (विकेटपिकर), रोहितकुमार पौडेल (कप्तान), कुशल मल्ल, दीपेन्द्र सिंह ऐरी, आरिफ शेख, गुल्शन झा, सोमपाल कामी, करण केसी, सन्दीप लामिछाने र ललितनारायण राजवंशी ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।