पोखरा महानगरपालिकाका मेयर धनराज आचार्यले सर्वोच्च अदालतको आदेशलाई अवहेलना गरी फेवाताल सिमसार क्षेत्रका जग्गा भोगचलनमा रोक लगाएको भन्दै स्थानीय आन्दोलित भएका छन् ।  

आन्दोलित स्थानीयले मेयर आचार्यले फेवातालको संरक्षण र संवर्द्धनमा लाग्नुको सट्टा उल्टै फेवाताल देखाएर सिमसारको नाममा स्थानीयलाई तर्साए र उठीबास लगाउन खोजेको भन्दै आन्दोलनमा उत्रिएका हुन ।

सर्वोच्च अदालतले फेवातालको ६५ मिटर मापदण्डभित्र रहेका संरचना हटाउन दिएको आदेशको अहिलेसम्म कार्यान्वयन गर्न भने महानगरले सकेको छैन । स्थानीयले अदालतको आदेश पालना नगर्ने, पहुँच र सम्बन्ध नपुग्नेलाई व्यक्तिगत जग्गा भोगचलन गर्न रोक लगाई अधिकारबाट वञ्चित गराउने, अनुहार, पहुँच, आदेश र मुखको भरमा कानुन स्थापित गर्ने पोखरा महानगरको विभेद र ज्यादती अन्त्यको लागि भन्दै फेवातालका उपल्लो क्षेत्रका बासिन्दा एकजुट भएका छन् । 

महानगरको ज्यादतीविरुद्ध सशक्त रुपमा आन्दोलनको उत्रने स्थानीयले बताएका छन् । फेवाताल क्षेत्रका स्थानीय युवराज खतिवडाले पोखरा महानगरपालिकाले अदालतको आदेश पालना नगरेको बताए । उनले महानगरले आवासीय जमिनमा हक जमाउन खोजेको बताए । स्थानीय खतिवडाले फेवाताल क्षेत्रको आवासीय जग्गा सुरक्षित गर्नको लागि प्रयोग गर्दा नियन्त्रणमा लिएका सवारीसाधन फिर्ता गर्न अदालतले आदेश दिँदासमेत पालना नगरेको बताए । 

उनले जग्गाका मोहीहरू सम्बन्धित निकायमा न्यायको लागि जान तयार रहेको बताए । खतिवडाले फेवातालभन्दा ५ किलोमिटर माथि रहेको जग्गामा समेत महानगरले हक जमाउन खोजेको बताए । उनले मेयरको प्रिय बन्न नसक्दा आफ्नो जग्गा आफैंले पाउन नसकेको बताए ।   

स्थानीय गीता भुजेलले पनि फेवातालभन्दा ५ किलोमिटर माथि रहेको आफ्नो जग्गाको भोगचलन गर्न पाउनुपर्ने बताइन् । उनले जग्गामा प्लटिङ गरेर अन्य सबैले आफ्नो तरिकाले भोगचलन गरे पनि आफूहरूले प्लटिङ गरेर खेती गर्न महानगरले नदिएको गुनासो गरिन् ।  

अर्का स्थानीय देवीलाल लामिछानेको पनि त्यस्तै गुनासो रहेको छ । उहाँले उच्च अदालतले फेवाताल क्षेत्रका तिरो तिरेका र लालपूर्जा भएका जग्गा हक भोग गर्न दिन आदेश दिए पनि महानगरले ज्यादती गरेर रोक लगाएको बताए । उनले जग्गाको रातोकिताब सिरानीमा राखेर हिँडिरहेको बताए ।  

महानगरपालिकाले आफ्नो चित्त नबुझ्ने र पहुँच नपुग्नेलाई डोजर लगाइ रोक लगाएको उनीहरूको आरोप छ । महानगरका मेयर आचार्यले आफ्नो चित्त बुझाई दिनेलाई प्लटिङ गरेर जग्गा कारोबार गर्न खुला छोडेको आरोप लगाए । उनीहरूले आवास क्षेत्रलाई मेयर आचार्यले हचुवाका भरमा सिमसार भन्दै स्थानीयलाई अनावश्यक दुःख र हैरानी दिँदै आएको बताए । 

वर्षौंदेखि जमिनको उपभोग गर्दै महानगरमा तिरो तिर्दै आएका जग्गाधनीलाई आफूखुसी भोगचलन गर्न रोक लगाउन नपाउने उनीहरूको माग छ ।