नेपाल ओमानमा जारी एसिसी प्रिमियर कप टी–२० प्रतियोगिताको सेमिफाइनलमा प्रवेश गरेको छ । सोमबार हङकङलाई ८ विकेटले हराउँदै नेपाल एक खेलअगावै प्रतियोगिताको सेमिफाइनलमा प्रवेश गरेको हो ।
तेस्रो खेलमा हङकङले दिएको १ सय १५ रनको लक्ष्य नेपालले १२.२ ओभरमा २ विकेट गुमाएर भेट्टायो । नेपालका लागि आसिफ शेखले ४० र कुशल भुर्तेलले ३२ रन बनाए । यस्तै, अविजित रहेका कप्तान रोहितकुमार पौडेलले २५ र सन्दीप जोराले १९ रनको योगदान दिए । हङकङका लागि एहसान खान र यासिम मुर्तजाले एक/एक विकेट लिए ।
त्यसअघि ओमान क्रिकेट ग्राउन्ड वानमा टस हारेर ब्याटिङको निम्तो पाएको हङकङ १८ ओभरमा झारिएको खेलमा १७.५ ओभरमा १ सय १४ रनमा अलआउट भयो ।
उसका लागि अशुंमन रथले २४ बलमा चार चौका र एक छक्काको मद्दतमा सर्वाधिक ३४ रन बनाए । यस्तै, जीशान अलीले १४, कप्तान निजाकत खानले १२ र एहसान खानले ११ रन जोडे ।
हङकङलाई सस्तैमा समेट्नेक्रममा नेपालका लागि तीव्र गतिका बलर अविनाश बोहराले उत्कृष्ट बलिङ गरे । उनले आज ४ ओभरमा २९ रन दिएर तीन विकेट लिए । अविनाश जारी प्रतियोगितामा लयमा देखिएका छन् ।
उनले मलेसिया र कतारविरुद्ध एकरएक विकेट लिएका थिए । यस्तै, दीपेन्द्र सिंह ऐरी र ललितनारायण राजवंशीले दुई/दुई तथा करण केसीले एक विकेट हात पारे । नेपालले दुई विकेट रनआउटको रूपमा प्राप्त गर्यो । नेपालले अब समूह चरणको अन्तिम खेलमा बुधबार साउदी अरेबियासँग खेल्ने तालिका छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
