सिओल– उत्तर कोरियाका सर्वोच्च नेता किम जोङ उनबारे विभिन्न अड्कलबाजी भइरहेका वेला उनले दक्षिण अफ्रिकी राष्ट्रपति सिरिल रामाफोसालाई पठाएको पत्र सार्वजनिक भएको छ । उत्तर कोरियाली सरकारी सञ्चारमाध्यमले सो पत्र सार्वजनिक गरेका हुन् ।
दक्षिण अफ्रिकाको स्वतन्त्रता दिवसको अवसरमा उत्तर कोरियाली नेता उनले बधाई दिँदै राष्ट्रपति रामाफोसालाई २७ अप्रिलमा पत्र पठाएको उत्तर कोरियाली समाचार एजेन्सी केसिएनएले जनाएको छ ।
पछिल्लो दुई साताभन्दा बढी समयदेखि उन सार्वजनिक कार्यक्रममा देखिएका छैनन् । त्यसपछि विश्वभरका सञ्चारमाध्यमले उनीबारे विभिन्न समाचार प्रकाशन गर्दै आएक छन् । कतिपयले किम गम्भीर बिरामी परेको बताएका छन् भने कतिपयले उनको मृत्यु भइसकेको दाबी गरेका छन् ।
सोही अनुमान चिर्न केसीएनएले सोमबार २७ अप्रिलमा उनले पठाएको पत्र सार्वजनिक गरेको हो । दक्षिण अफ्रिकी राष्ट्रपति रामाफोसालाई उनले पठाएको पत्रमा भनिएको छ, ‘दुई मुलुकको मैत्रीपूर्ण सम्बन्ध अनन्तकालसम्म चलिरहनेछ । दुई देशबीचको सम्बन्ध थप सुदृढ हुँदै जानेछ ।’
यसअघि सोमबार दक्षिण कोरियाले उत्तर कोरियाली नेता किम जोङ उन जीवित र स्वास्थ भएको दाबी गरेको थियो । राष्ट्रपति मुन जाइ इनका परराष्ट्र नीति सल्लाहकार मुन चुङ इनले किम जोङ उन जीवित र स्वस्थ रहेको बताएकी थिइन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।