नेकपा एमालेका कारबाहीमा परेका नेता भीम रावलले प्रधानमन्त्री केपी शर्मा ओलीको राष्ट्रघाती तथा जनघाती निर्णयका कारण आफूहरु दृढ पाइला चाल्नै पर्ने अवस्थामा पुगेको बताएका छन् ।
रावलले सामाजिक सञ्जालमार्फत अोलीले शुक्रबार गरेको मन्त्रिपरिषद पुनर्गठनको विरोध गर्दै उक्त कदम राष्ट्रघाती, जनघाती र लोकतन्त्र तथा संविधानको मर्म र भावनाविपरीत भएको बताए ।
नेता रावलले ओलीले आफूसँग ५ मन्त्रालय राखेर ’वाह्य शक्ति’लाई मक्ख पार्न अरू मन्त्रालय जसपा (महन्थ) लाई धुप वत्ति गर्नसक्ने कुरा ट्विट गरेको र त्यो हिजोको मन्त्रिपरिषद् हेरफेरबाट पुष्टि भएको बताए ।
कामचलाउ प्रधानमन्त्रीले गरेको मन्त्रिपरिषद पुनर्गठन संवैधानिक र लोकतान्त्रिक मान्यता विरोधी र गत आम निर्वाचनमा जनताले दिएको जनादेशका विरुद्धमा भएको रावलको भनाइ छ ।
रावलले संविधान संशोधनका लागि कार्यदल गठन गर्नुपनि राष्ट्रघात भएको बताए । उनले लेखेका छन्, 'दुईपटक संविधानसभाको निर्वाचन गरी देश र जनताले ठूलो मूल्य चुकाएर जारी गरेको संविधान संशोधन गर्न भनी कथित कार्यदल गठन गर्नु राष्ट्रघात र जनघात हो । यसमा रहेका लोकतन्त्रघातीहरूको नाम सार्वजनिक होस् ।'
प्रधानमन्त्री ओलीका यस्तै देशघाती कदमका कारण आफूहरुले नयाँ कदम चाल्न बाध्य भएको रावलले बताए । उनले सबै देशभक्त लोकतन्त्रवादी एकजुट भएर देश, लोकतन्त्र र जनताको अधिकार तथा हितको रक्षाका लागि अग्रसर हुन पनि आह्वान गरेका छन् ।
प्रमं केपीको संवैधानिक र लोकतान्त्रिक मान्यता एवम् राष्ट्रहित विरोधी, स्वेच्छाचारी र अनुत्तरदायी चरित्र र कार्य जेठ २१ को मन्त्रिपरिषद्को हेरफेरमा अँझ छताछुल्ल भएको छ- pic.twitter.com/0P8Nj0BfVH
— Dr. Bhim Rawal (@BhimRawal179) June 5, 2021
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।