आइसिसी टि–२० विश्वकपमा भारतले तेस्रो जित दर्ता गरेको छ । उसले सुपर १२ को समूह ‘२’ अन्तर्गत सोमबार भएको आफ्नो अन्तिम खेलमा नामिबियालाई ९ विकेटले पराजित गरेको हो ।
१३३ रनको लक्ष्य भारतले १५.२ ओभरमा मात्र १ विकेट गुमाउँदै पुरा गर्यो । भारतको जितमा रोहित शर्मा र केएल राहुलले अर्धशतकीय पारी खेले ।
रोहितले ९.५ ओभरमा जान फ्राइलिङ्कले जिन ग्रिनबाट क्याच गराउनुअघि ३७ बलमा ७ चौका र २ छक्कासहित सर्वाधिक ५६ रनको योगदान दिए ।
राहुलले ३६ बलको सामना गर्दै ४ चौका र २ छक्काको मद्दतमा अविजित ५४ रन प्रहार गर्दा सूर्यकुमार यादव २५ रनमा अविजित रहे
नामिबियाका लागि १ मात्र विकेट जान फ्राइलिङ्कले हात पारे ।
यसअघि दुबई अन्तर्राष्ट्रिय क्रिकेट मैदानमा टस हारेर ब्याटिङको निम्तो पाएको नामिबियाले निर्धारित २० ओभरमा ८ विकेट गुमाउदै १३२ रन जोडेको थियो ।
नामिबियाका लागि डेभिड विसेले सर्वाधिक २६ र स्टेफन वार्डले २१ रन जोड्दा जान फ्राइलिङ्क १५ तथा रुवेन ट्रम्पलम्यान १३ रनमा अविजित रहे ।
भारतका रविन्द्र जडेजा र रविचन्द्रन आश्विनले ३–३ विकेट हात पार्दा जसप्रित बुमराहले २ विकेट लिए ।
प्रतियोगिताबाट बाहिरिसकेको भारतका लागि यो जित केबल सान्त्वनामा मात्र सीमित भएको छ ।
योसँगै भारतले ५ खेलमा ३ जित र २ हारको नतिजासहित सहित ६ अंक जोडेर समूहको तेस्रो स्थान तथा नामिबियाले ४ हार र १ जितसहित २ अंकका साथ पाँचौ स्थानमा रहेर प्रतियोगिताको अन्त्य गरेका छन् ।
यो समूहबाट पाकिस्तान विजेता तथा न्युजिल्यान्ड उपविजेताका रुपमा सेमिफाइनल प्रवेश गरे ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
