त्रिकाेणात्मक टी-२० सिरिजमा घरेलु टाेली नेपाल विजयी सुरुवात गरेकाे छ ।
नेपालले साेमबार भएकाे पहिलाे खेलमा पपुवा न्युगिनी (पिएनजी)माथि १५ रनकाे जित हात पारेकाे हाे ।
१८४ रनकाे लक्ष्य पछ्याएकाे पिएनजीले १९.२ ओभरमा सबै विकेट गुमाउँदै १६८ रन मात्र बनाउन सक्याे ।
पिएनजीका लागि नाेर्मन भानुआले अर्धशतकीय पारी खेले । २९ बलकाे सामना गरेका उनले ५ चाैका र ४ छक्कासहित ५२ रन बनाए ।
सेसे बाउले ३० र चार्ल्स अमिनीले २२ रन जाेडे ।
आठाैं विकेटका लागि भानुआ र चाड साेपरले ६७ रनकाे साझेदारी गरे पनि पिएनजीलाई जित दिलाउन भने सकेनन् । साेपर १२ रनमा अविजित रहे ।
नेपालका कप्तान सन्दीप लामिछाने र करण केसीले ३-३, अविनास बाेहराले २ तथा साेमपाल कामीले १ विकेट हात पार्दा १ विकेट रन आउटका रूपमा प्राप्त भयाे ।
यसअघि कीर्तिपुरस्थित त्रिवि क्रिकेट मैदानमा टस हारेर ब्याटिङकाे निम्ताे पाएकाे नेपालले निर्धारित २० ओभरमा ९ विकेट गुमाउँदै १८३ रन बनाएकाे थियाे ।
नेपालका लागि आसिफ शेखले सर्वाधिक ४३ रनकाे याेगदान दिए ।
११.३ ओभरमा अली नाओले सिमाेन अटाइबाट क्याच गराउनुअघि उनले ३५ बलकाे सामना गर्दै ५ चाैका र १ छक्का प्रहार गरे ।
राेहितकुमार पाैडेलले ३४ र आरिफ शेखले ३१ रन बनाए ।
दोस्रो विकेटका लागि आसिफ र रोहितले ८० रनकाे साझेदारी गरेका थिए ।
पिएनजीका लागि चार्ल्स अमिनी, अली नाओ र चाड साेपरले २-२ तथा रिले हिकुरे र नाेर्मन भानुआले १-१ विकेट हात पार्दा १ विकेट रन आटका रूपमा प्राप्त भयाे।
आफ्नो दोस्रो खेल पिएनजीले मंगलबार तथा नेपालले बुधबार मलेसियासँग खेल्नेछ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।