बिहीबार (२४ असार) नेपाल प्रहरीको केन्द्रीय अनुसन्धान ब्यूरो (सिआईबी) ले मेडिकल व्यवसायी तथा प्रतिनिधिसभा सदस्य डा. सुनिल शर्मालाई पक्राउ गर्यो । नक्कली शैक्षिक प्रमाणपत्रको मुद्दामा सिआइबीले शर्मालाई पक्राउ गरेको हो ।
उनी समातिएलगत्तै नक्कली शैक्षिक प्रमाणपत्रको मुद्दामा पक्राउ पर्नेको संख्या बढेको छ । यो समाचार तयार पार्दासम्म यस प्रकरणमा शर्मासँगै डा. श्रद्धा सिल्पकार, डा. रामबाबु यादव, डा. रञ्जित यादव, डा. एलिना साह र डा. अमित चौधरी पक्राउ परेका छन् । उनीहरू विभिन्न अस्पताल तथा मेडिकल कलेजमा कार्यरत रहेका सिआइबीले जनाइएको छ ।
यस्तै, सिआईबीले नक्कली शैक्षिक प्रमाणपत्रको मुद्दामै शुक्रबार डा. मनिष चौधरी र डा. पुनम थापालाई पनि पक्राउ गरेको छ । मोरङमा क्लिनिक चलाएर बसेका मनिषको प्लस टुको नेपालको सर्टिफिकेट नक्कली भएको भन्दै सिआईबीले पक्राउ गरेको हो । सिआईबीले कथित नक्कली प्रमाणपत्रधारी डाक्टरमाथि चलाएको अपरेसनमा अहिलेसम्म एक सांसदसहित ८ जनालाई पक्राउ गरेको हो ।
गत वर्ष २७ असोजमा सुर्खेतको वीरेन्द्रनगरबाट एकजना नक्कली चिकित्सक पक्राउ परेका थिए । पक्राउ पर्नेमा जाजरकोटको शिवालय गाउँपालिका–१ का २२ वर्षीय डिलबहादुर महतरा रहेका थिए । नक्कली चिकित्सक बनेर उनले डेन्टल केयर क्लिनिक सञ्चालन गरिरहेका थिए ।
गत वर्ष नै १३ वैशाखमा मोरङको दुई स्थानमा क्लिनिक सञ्चालन गरिरहेका दुईजना नक्कली चिकित्सकलाई प्रहरीले पक्राउ गरेको थियो । पक्राउ परेका दुवैजना भारतीय नागरिक थिए । उनीहरूले नेपाल मेडिकल काउन्सिलबाट अनुमति पत्र नलिई क्लिनिक सञ्चालन गरी ‘डाक्टर हुँ’ भन्दै ठगी गरेको उजुरी परेपछि उनीहरूलाई पक्राउ गरिएको प्रहरीले जनाएको थियो ।
नेपालमा बेला–बखत नक्कली शैक्षिक प्रमाणपत्रधारी तथा नक्कली चिकित्सक पक्राउका घटना बाहिरिरहेका हुन्छन् । बर्सेनि नक्कली शैक्षिक प्रमाणपत्रधारी चिकित्सकलाई पक्राउ गर्दा जनता झस्किन थालेका छन् । बिरामी हुँदा निर्धक्क डाक्टरको सल्लाहको पालना गर्नेहरू आशंका गर्न थालेका छन् ।
बारम्बार नक्कली शैक्षिक प्रमाणपत्रधारी चिकित्सकको खुलासा हुँदा पनि सरोकारवाला निकाय भने गम्भीर हुन सकेका छैनन् । स्वास्थ्यजस्तो सम्वेदनशील विषयमा सरकारले व्यवस्थित तरिकाले अघि बढेको पाइँदैन । विगतमा पनि नक्कली डाक्टर पटकपटक पक्राउ परे । तर तत्कालीन सरकारहरूले पनि यस विषयलाई गम्भीररूपमा लिएनन् ।
नक्कली चिकित्सकका घटना पटक–पटक किन बाहिरिरहन्छन् भन्ने फरकधारको प्रश्नमा नेपाल मेडिकल काउन्सिलका रजिस्ट्रार डा. कृष्णप्रसाद अधिकारी नक्कली चिकित्सकविरुद्ध उजुरी परेपछि छानबिन गर्दा उक्त घटना बाहिरिने गरेको बताउँछन् ।
‘चिकित्सकहरूको नाम दर्ता गर्दा उनीहरूका सबै शैक्षिक प्रमाणपत्र काउन्सिलले हेर्छ । दर्ताका बखतमा पनि चिकित्सकहरूलाई ‘काउन्सिलमा पेस गरिएका शैक्षिक प्रमाणपत्र झुटा साबित भए, सोहीअनुसारको कारबाही गरिनेछ’ भनिएको हुन्छ । उनीहरूले काउन्सिलका सबै नीति, नियममा टेकेर दर्ता प्रक्रिया अगाडि बढाउँछन्,’ डा. अधिकारीले भने, ‘यति हुँदाहुँदै पनि बिना डर, त्रास उनीहरू काउन्सिलमा दर्ता प्रक्रियामा जान्छन् । पछि नक्कली चिकित्सकविरुद्ध मुद्दा पर्छ र छानबिन भएपछि उनीहरू नक्कली भएको थाहा हुन्छ ।’
यस्तै, उनले पहिलेको समयमा चिकित्सकले पेस गरेका शैक्षिक प्रमाणपत्रको विस्तृत खोजी गर्ने नीति नियम नहुँदा पनि यस्ता घटना बाहिरिने गरेको बताए । ‘पहिले चिकित्सकले पेस गरेका प्रमाणपत्रबारे खोजी हुँदैन थियो । तर, आजभोलि शंका लागेका शैक्षिक प्रमाणपत्रबारे काउन्सिलले खोजी गर्छ,’ डा. अधिकारीले भने ।
काउन्सिलका अनुसार नक्कली डाक्टर खोजी गर्ने प्रहरीको ‘अपरेसन चार्ली फोक्टर’ अन्तर्गतले लामो समयदेखि अनुसन्धान भइरहेको छ । अहिले पुरानो मुद्दा हेरेर अनुसन्धान पनि भइरहेकाले यसपटक पनि मेडिकल क्षेत्रमा रहेका नक्कली शैक्षिक प्रमाणपत्रधारी चिकित्सक पक्राउपर्ने काउन्सिलको दाबी छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।