नेकपा एकीकृत समाजवादी पार्टी दर्ताका लागि निर्वाचन आयोगमा निवेदन दिएका यो दलका संयोजक माधवकुमार नेपालले अहिले वार्ताका नाममा बेइमानी तथा धोखाधडीको निरन्तरता भइरहेको बताएका छन् ।
नेपालले कम्युनिस्ट आन्दोलन र सँस्कृतिको रक्षा गर्न आफूहरुले नयाँ पार्टी खोलेको पनि बताएका छन् ।
सामाजिक सन्जाल फेसबुकमा एक स्टाटस लेख्दै नेपालले यस्तो बताएका हुन् । उनले पछिल्लो समय पटकपटक बेइमानी एवं धोखाधडीको निरन्तरता स्वरुप नै वार्ता र सहमतीका भ्रमपूर्ण समाचारहरु सार्वजनिक भएको भन्दै यस्ता भ्रममा नपर्न अनुरोध गरेका छन् ।
नेपालले नेकपा एमालेले स्थायी कमिटी बैठक बोलाउने निर्णय गरेपछि यस्तो प्रतिक्रिया दिएका हुन् । सोमबार मात्र माधवकुमार नेपालको साथ छाडेका स्थायी कमिटी सदस्यहरु एमाले अध्यक्ष केपी शर्मा ओलीसँग छलफलका लागि बालकोट पुगेका थिए । त्यहाँ उनीहरुले यसअघिको १० बुँदे अक्षरशः पालना गर्न आग्रह गरेका थिए ।
यही विषयमा छलफलका लागि आज एमालेले स्थायी कमिटी बैठक बोलाएको छ ।
उता, नेपाल चाहिँ प्रस्तावित एकीकृत समाजवादी पार्टीका सदस्य तथा आफूनिकट सांसदहरुसँग रिफ्रेसमेन्टका लागि चन्द्रागिरी पुगेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
