इलामको करफोकमा गुञ्जियो नेपथ्य [तस्बिरहरू]

५ हजार फिट उचाइमा धुपी सल्लाले घेरिएको जंगलबीच फराकिलो चौर छ करफोकमा । नजिकै राजमार्ग र विद्यालय भएपनि करफोकको यो ठाउँ प्रायः सुनसान रहन्छ । खासै मानिसको चहलपहल देखिँदैन । तर, शनिबार बेलुकी भने यहीको सुनसान फाँटमा हजारौं दर्शक जम्मा भए– नेपथ्यको कन्सर्ट हेर्न । 

सधैं सहर बजारको भीड अघिल्तिर उभिने नेपथ्यले यसपटक ५ हजार मिटर उचाइमा प्रकृति र संगीतको समागम खडा गर्‍यो । पातलिँदो पहाडका बस्तीबाट जम्मा भएको हजारौंको भीड नेपथ्यसँगै झुम्यो । 

कन्सर्ट सुरु हुनुभन्दा केही घण्टाअगावै फिक्कलबाट सदरमुकाम इलाम बजारलाई जोड्ने राजमार्गमा चलहपहल सुरु भएको थियो । निकै परबाट आएका दर्शकहरू आफ्ना सवारीसाधन राख्ने ठाउँ खोज्दै थिए । ४ बजे बेलुकी ढोका खुलेपछि उनीहरू अलिअलि गर्दै करफोक विद्यामन्दिरको परिसरतर्फ ओर्लन सुरु गरे ।

बेलुकीको ६ बज्दा कन्सर्ट सुरु भयो । मञ्चमा उक्लेका गायक अमृत गुरुङले यसै भेगबाट संकलन गरिएको गीत ‘कोशीको पानी यो जिन्दगानी’ बाट साँझको थालनी गरेका थिए ।  

‘हाम्रोतिर नेपथ्य नआएको धेरै भइसकेकोले नजिकै पर्ने यो ठाउँमा साथीहरूसँग आयौँ,’ कन्सर्टकै लागि दार्जिलिङदेखि आएका जितेन्द्र रसाइली आफ्नै शैलीमा भनिरहेका थिए, ‘बबाल रमाइलो लाग्यो ।’ 



फिक्कल, पञ्चकन्या र कन्याम गाविस जोडेर बनेको सूर्योदय नगरपालिकाको सीमास्थित करफोक भारतसँग जोडिएको छ । ‘नेपथ्यको उपस्थितिलाई नयाँ वर्षको शुभकामना व्यक्त गर्ने अवसरका रुपमा पनि लिएका छौँ,’ नगरप्रमुख रणबहादुर राईले भने, ‘चियाको निम्ति प्रसिद्ध यस स्थानलाई अब पर्यटकीय केन्द्रका रूपमा विकास गर्न पनि यस्ता कार्यक्रमले मद्दत गर्ने विश्वास छ ।’ कुल भू–भागमध्ये ६० प्रतिशतभन्दा बढी चियाबगानले ओगटेको यो नगरपालिकाले बर्सेनि ५० लाख किलोभन्दा बढी चिया उत्पादन गरेर यहाँका माटो हावापानीको स्वाद संसारभरलाई बेच्ने गरेको छ । 



देशमै सबैभन्दा पहिले सूर्योदय देखिने श्रीअन्तुदेखि लिएर सूर्यास्तका मनोरम दृश्य देखिने उच्च भूभागका रमाइला चियाबारी र धुपी सल्लाका जंगलहरु यस भेगमा जताततै पाइन्छन् । पछिल्लो समय सुविधाजनक होटलले भरिभराउ यो स्थान अब व्यापकस्तरमा पर्यटकलाई निम्त्याउन तम्तयार छ ।

कन्सर्टमा गायक अमृतले इलामको सुन्दरता बयान गर्दै कवि भूपि शेरचनको पुरानो भनाइ स्मरण गरेः ‘सक्ने भए अलि अलि इलाम देशभरि लगेर छरिदिन्थे ।’ अमृतले तमाम दर्शकलाई नेपालमा जताततै रमाइला पर्यटकीय स्थल भएकाले स्वदेशको भ्रमण गर्न र आफ्नो भूगोल अनि समाज चिन्न आव्हान पनि गरे । यसपालिको कन्सर्टमा सँधै दोहोरिने नेपथ्यका सदाबहार हिट गीतहरु लगायत भर्खरै रिलिजभएको ‘पचासै वर्षमा जुग कहाँ पुग्यो नि’ पनि प्रस्तुत गरिएको थियो ।  

युवायुवतीको बाहुल्य रहेको भीडमा दर्शकबीच विविधता पनि उत्तिकै देखिन्थ्यो ।  राजधानी काठमाडौंको सञ्चारकर्ममा धेरै वर्ष बिताएका लेखक केदार शर्मा पछिल्लो समय करफोकस्थित जन्मथलोमै आएर बसोबास गर्न थालेका छन् । शनिबार घर छेवैको मैदानमा आयोजित नेपथ्य कन्सर्टमा उनी पनि भेटिए ।

‘धेरै पहिलेदेखिको चिनजान भएता पनि नेपथ्य समूहको कन्सर्ट हेर्ने अवसर मलाइ बल्ल आफ्नै आँगनमा जुरेको छ,’ शर्मा भनिरहेका थिए, ‘अमृतजीको उर्जा हामी सबै दर्शकहरुमा विस्तार हुँदा गज्जब रमाइलो लाग्दो रहेछ ।’

इलामको गढीथुम्कामा निर्माणाधीन न्युपी थर्पा छोलिङ गुम्बाको सहयोगार्थ आयोजना भएको यो कन्सर्ट ‘इलाम गुरुङ समाज’को प्रस्तुति थियो । ‘कन्सर्टमा करिब ५ हजार दर्शक उपस्थित भए,’ आयोजक एवं गुम्बा निर्माण समितिका अध्यक्ष हरि गुरुङले भने, ‘यो आयोजना सफलताका साथ सम्पन्न भएकोमा खुशी लागेको छ ।’ 

कन्सर्टको अन्त्यतिर अमृतले दर्शकसँगै ‘अब कुन गीत सुन्ने ’ भनेर प्रश्न गरेका थिए । त्यसमा अधिकांश दर्शकले ‘रेश्शम’ भनेर चिच्याए । यसरी ‘रेशम’ पछि ‘तालको पानी’ हुँदै ‘रातो र चन्द्रसूर्जे’ गीतमा पुगेपछि जम्मा १७ वटा गीत सुनाएर कार्यक्रम अन्त्य भएको थियो ।

कन्सर्टमा मुख्य गायक अमृतलाई ड्रमसेटमा ध्रुव लामा, बेस गितारमा सुबिन शाक्य, गितारमा निरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए । 

  • प्रकाशित मिति : चैत ४, २०८० आइतबार ९:५७:३१

फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्

यो सामग्री सेयर गर्नुहोस्

यो पनि नछुटाउनुहोस्
मल्टिमिडिया