नेपाली राष्ट्रिय महिला टिम तथा एपिएफकी फरवार्ड सावित्रा भण्डारी (सम्बा) करिब १ वर्ष मैदान बाहिर रहने भएकी छन् ।
राजधानीमा जारी राष्ट्रिय महिला लिग अन्तर्गत सोमबार नेपाल पुलिस क्लबसँग खेल्ने क्रममा उनको घुँडामा चोट लागेको थियो उक्त चोट गम्भीर देखिएपछि उनी लामो समय मैदान बाहिर रहने पक्का भएको हो ।
पुलिस विरुद्धको खेलमा ल्यान्डिङ नमिल्दा उनको दायाँ घुँडामा चोट लागेको थियो । चोटका कारण सावित्राले ७९ औं मिनेटमा मैदान छाडेकी थिइन् ।
चोटपछि बी एन्ड बी अस्पतालमा गरिएको एमआरआई रिपोर्टमा घुँडाको एन्टेरिएर क्रुसिएट लिगामेन्ट (एसिएल) च्यातिएको देखिएको थियो । जसको शल्यक्रिया गर्नुपर्ने बताइएको छ ।
लिग उपाधि नजिक पुगेको एपिएफलाई सावित्राको अनुपस्थितिले निकै असर गर्ने देखिन्छ ।
सावित्राकै उच्च प्रदर्शनमा एपएफले विजयी यात्रालाई १० औं खेलसम्म पनि जारी राख्न सफल भएको छ । उनले १० खेलमा ४३ गोल गरिसकेकी छन् ।
उसले बुधबार विराटनगर महानगरपालिकासँग खेल्दै छ । यो खेलमा जित वा बराबरीको नतिजाले एपिएफलाई विजेता बनाउने छ । एपिएफले लिगको अन्तिम खेल शुक्रबार त्रिभुवन आर्मी क्लबसँग खेल्नेछ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।