यूएईमा जारी एसिसी यू–१९ एसिया कप क्रिकेटमा भारतविरुद्ध नेपालले निकै खराब सुरुवात गरेको छ । नेपालले २१ रन जोड्दा महत्वपूर्ण ६ विकेट गुमाइसकेको छ । नेपालले छैटौँ विकेटको रूपमा गुलशन झालाई गुमाएको हो ।  

उनी ४.५ ओभरमा ४ रनमै एल्बीडब्लू धरापमा परे । नेपालले पाँचौं विकेटको रूपमा दीपकप्रसाद डुम्रेलाई शून्यमै गुमायो । उनी शून्यमै बोल्ड भए ।  

नेपालले चौथो विकेटको रूपमा कप्तान देव खनाललाई गुमाउन पुग्यो । उनी ८.५ ओभरमा २ रनमै आउट भए । नेपालले तेस्रो विकेटको रूपमा अर्जुन कुमाललाई गुमायो । उनी ७.३ ओभरमा आराध्या शुक्लाको बलमा क्उाच आउट हुन पुगे । नेपालले दोस्रो विकेटको रूपमा उत्तम थापा मगरलाई गुमायो । 

उनी ६.२ ओभरमा राज लिम्बानीको बलमा शून्यमै बोल्ड भए । नेपालले पहिलो विकेटको रूपमा दीपक बोहरालाई एक रनमै गुमाउन पुग्यो ।  उनी ४.१ ओभरमा लिम्बानीको बलमा विकेटकिपरबाट क्याच आउट भए । टस हारेर ब्याटिङको निम्तो पाएको नेपालले आज प्लेइङ–११ मा दुई खेलाडी परिवर्तन गरेको छ । 

नेपालले आकाश त्रिपाठी र विपिन रावलको स्थानमा दिपक बोहरा र दीपकप्रसाद डुम्रेलाई मौका दिएको हो । यी दुवै खेलाडीले पहिलो खेल खेलिरहेका हुन् ।

सेमिफाइनल यात्रा गर्ने हो भने नेपालले आज भारतलाई विशाल अन्तरले हराउनुपर्नेछ । यस्तै, नेपाल सेमिफाइनल पुग्न पाकिस्तानले अफगानिस्तानविरुद्ध पनि उत्कृष्ट जित निकाल्नुपर्ने समीकरण बनेको छ ।

नेपालविरुद्धको खेल भारतका लागि पनि महत्वपूर्ण छ । यदि नेपालसँग हार बेहोरेमा उसको सेमिफाइनल यात्रामा धक्का लाग्न सक्छ । पहिलो खेलमा अफगानिस्तानलाई ७ विकेटले हराएको भारत दोस्रो खेलमा भने पाकिस्तानसँग ८ विकेटले पराजित भयो । अहिले ऊ २ अंकका साथ तालिकाको दोस्रो स्थानमा छ ।

यता अंकविहीन नेपाल भने तालिकाको पुछारमा छ । नेपालले पहिलो खेलमा पाकिस्तानसँग ७ विकेट तथा दोस्रो खेलमा अफगानिस्तानसँग ७३ रनको हार बेहोरेको थियो ।